امتحانات الباكلوريا لهذه السنة 2010

من طرف **MaHFouD** الجمعة يوليو 02, 2010 10:32 pm

السلام عليكم
اهلا وسهلا بكم اخواني انا اليوم جيت نهضر ليكوم على الباكلوريا هاد
الحيوان الخطير لي ولا كايهدد الشباب بالانحراف ، شحال من واحد كايتقاتل
معا الباك ملي ماكايديهش كاينتاحر ولا كايختل عقليا والله يحفض ، المهم
ماعليناش من هادشي نعاودليكوم الاجواء ديال الباكلوريا بعدا قبل بأسبوع من
التدواز كاتلقا الفوتوكوبي عامرااا والزحم عليها وكولي كايطبع غير التحارز
هالي كايشري كيلو هالي جوج كيلو وكايعمرو جيابهوم مزيان وكايمشيو يدوزا داك
الصبح غير الله يستر كاتنوض معا ديك 5 ديال الصبح كاتراجع شويا نتا كاتبغي
تمشي تفطر وهي كاتنقز الواليدا واكولك اوليدي هاد شويا ديال زبيب وهاد جوج
تمرات وهاد الشويا ديال الشكلاط ، اناري الواليدا راه غير متيحان هادا
وزايدون الشكلاط راه ماغاديش يحلينا المعادلا والله كون ماكنتي حافض لا
طفرتيه ، لموهيم كانديرليها خاطرها وكاناكلوا ، وكانمشي نصلي الله يتقبل ،
ومن بعد انا كانبغي نخرج باش مانطلاقا تاوحد يزعجني وانا كانلقا صاحبي
كايتسناني أووو لاباس عليك ، الحمد لله ، ايوا حافض شويا ، انا كانكر
كانقول والو اصاحبي ماقايس والو (كانخاف من العين) لموهيم كانمشيو للمدرسة
داك الجو داير بحال العيد لكبير الجو بارد بيخير لابس جاكيطا ، وانا نطلاقا
توتا قالتلي كيف داير ، لاباس الحمد لله قالتلي واش حافض قولتليها راه
معول عليك توريني راه ماعنديش معا الفلسفة قالتلي وا نتا الاول وانا يعجلني
الحال ، لول !! لموهيم حلو لينا الباب دخلت للقسم نيشان كانقلب على رقمي
لقيت راسي جاي فالطوالا الولى وبقينا كانتسناو الاستاد لي يدخل وهي تجي
واحد المسخوطا غير من الشوفا كاتخلع لموهيم فرقات علينا الاوراق ومالقيتش
داكشي فالتحرزة الله ياربي وانا نبقا كانخربق شوا وهي تبانلي ديك الدريا
كاتجاوب وملي سالات لاحتلي الوراق وهبت عليهوم ، ـهههـ،ـ وملي ساليت قلت
ماكاين مايدار ارا نحمق بالسادا شويا قلت ليها سادا جيبيلي ورقة جديدا
جابتها قلتا غير ديها اسادا صافي وهوا داك الساد لي معاها مكالي فيها باغي
غير يهضر وكايقونا واصافي سكتوني وهو كاشوف فيها خرجت بيخير معا راسي 2
ساعات كفاتني للتحليل والعالم وانا خارج وهوما الدراري واعقل اسيمو هبطتي
علا الورقة وماعقلتيش علينا وانا نقوليهوم واراه غير التخربيق سالينا
الامتحان رجعت للدار لي طلاقاني كيف دوزتي كيف دوزتي تقول مدوز كونكور ديال
تاويزاريت ، المهم سالينا جميع المواد ونهار ديال التعلاق مانعستش بايت
كانحسب هادي فيها 14 ضربها ف 5 كاتعطيك 70 يقدو يحطولي 13 زيد عليها 12
ديال الجهاوي نقص منها المراقبة 15 وضرب ف 5 وقسم علا 4 وناري ضماغي ناض
يحرقني لا غدا فالصباح بقيت غير علا الاس ام اس سيفطت شي 10 ماجاوبونيش
مشيت باش نشوف التعلاق هوما حلو الباب وانا كانقلبلا علا سميتي فالجيها
ديال المستدركين يسحابني هي الناجحون كانقول ياربي نلقاها هنا فتالي جاعندي
واحد قالي راه لهيه وانا مشيت فداك الزحام كانقلب مالقيتهاش المرة الاولى
التانيا والو التالتا فتالي جا واحد الساط قالي هانتا لفوق اصاحبي وانا
نضربها بواحد التغويتا واااااو نجحت ورجعت فرحان للدار ولي طلاقاك مونادا
مونادا وليت شركا ديال كوكا وهكدا داز الامتحان ديال البكلوريا هاد العام

تحياتي لكم خواني الى اللقاء